3Jo | MMX | STEP |

3 Jon Lovoang Sepsev Avantun At Ne Jon

Levelinga Loklox Axasep

Levenmaares 95-100 A.D.

Jon neni laradi loklok ka anasa at ne Iesu, neni ga malagan i na lovoang ti lentangas teren ne Gaius. Anai ni lovoang tuturun. At nai lovoang ne Jon goxo tong asuvos laasen teren, ketla limixin diga doma i do ne Jon neni ga malagan i. Keneng at nai lovoang at lengkakan 9-11 neni levelinga matmatkun. Mo levelinga i lok keretna: Atana gugu mi lodoxoma nunuan atdik kusu ri soxolik ka luvuttadi loklok tatao ri lotu. Ixo lox avukat do atana soxolik ka luvuttadi amgomgo at na lavatkangka kusu dinam gomgo at lotu, atla ne Diotrepes ga lox axatu kapmek lotu, la lorooro at limixin lotu goxok mokso, la at na mun langas loklok la lorooro at lotu atdi goxo lox avukat. Kuren la nedik atana soxolik ka nedi luvuttadi ua di balamu aleng ne Moroa, kusu dinam gomgo ngan luvuttadi amgomgo at lotu, la kusu nedik taba mumu asu di.

Lengkot silok keneng at na lovoang:1:1-4 Lavapaase momo.1:5-8 Lavapaase mumu asu ri ne Gaius.1:9-12 Lavapaase mumu ne Diotrepes la ne Demitrius.1:13-15 Lavapaase abeese.

3 John

Lavapaase Axasep

1 Nenia lamgomgo at lotu.

A malagan na lovoang ti lentangas orong tarak, ne Gaius. Nenia a balamu ruturun u.

2 Lentangas tinotno rak. Nia a sing ne Moroa do una momo mi lorooro avukat u ruuna ka i at labantuxu ram kerekngan loroonan taram i ruuna lorooro avukat. 3 Nenia aga lok momo aleng at loxonaleng leventaba at luvutneton dik diga rupot la diga vaase asuusu lorooro ram, do u ruturun amisik, i ngan do lorooro ram ik sixit emu mi levelinga ruturun at ne Moroa. 4 Ise nenia a ronga i do luvutnuruk di mumu asu luruturun, nenia a lok momo aleng.

Jon Ga Emi Asu Mi Ne Gaius

5 Lentangas orong tarak. At lugugu ram ti lok tooro luvutneton dik, uk lox ampana avukar i, keke i do nedi limixin dik taxoklen di. 6 Diga vaase asuusu labalamu ram to melamgo at limixin at lotu nade. La ba lox avukat do una lok tooro nedi at lavatpas atdi, mila loklok kerepmo i epovo at lavavara at ne Moroa. 7 Diga on basinge lara menemen atdi ri vaase asu laasen at ne Karisito la di goxo lok kaka tevempanga anan kopla tevempilas boro at lavamolon. 8 Kuren la i epovo rinotno do nedik limixin nuunu ata lok maraose mi nom luvuttadi kusu nedik axap ata gugu eburu ti tong asu levelinga ruturun.

Diotrepis Mi Ne Demitrius

9 Aga malagan pam lovoang ti limixin nuunu at lotu mumu i na lavanga; ketla ne Diotrepis neni laradi i vavara aleng i do na lok ngan lamgomgo atdi, la neni ixo mu asu levelinga atnama. 10 Kuren la do nenia ana vot saparap nimi, anaba tong asu axap lempanga neni ira lok pam i, mo i lok kapmek; ik lok levempapaase ren mumu nama ua i lok kapmek aleng. Neni xopmen nak lok mene nga mo loklok, ketla neni ixok lok tooro bok luvuttadi vavang do dit pot to at lemenemen teren la neni ip sep pepe limixin at lotu mo di vavara nak lok tooro mo luvuttadi vavang; la ik lok kepe bok mo limixin basinge lixitkis keneng at lotu.

11 Lentangas tinotno rak. Nemen gat uguta mu asu loklok at luvuttadi xapmek; ketla una mu asu leveloklox avukat. Do nege i lok leveloklox avukat, neni at ne Moroa; la do nege i lok laxakapmek, neni kovisi na ven kibis ne Moroa.

12 Limixin axap di paase levelinga avukat mumu ne Demitrius la lorooro ren ik sixit epovo mi levelinga ruturun. Nema bok ma paase levelinga avukat mumu i, la nenu uklen i do na levelinga atnama i ruturun.

Levempapaase Avit

13 A ruuna laxalinga solo xusu ana tong i ru, ketla a xopara i xusu ana malagan i mi lempanga mamalagan. 14 Am doma alii i do aba ven ba u melemu la ataba epentu la ata epaase.

15 Limila na nemen eburu minu; nedi larapen tangas axap taram nade di lox aonon levelinga momo ru. Nenu xa una raba levelinga momo ri larapen tangas atnama medo. I ruturun.